बेइजिङ

बेइजिङ चीनया केन्द्र सरकारया राजधानी व महानगर खः। थ्व नगर चीनया राजनैतिक, सांस्कृतिक, प्राविधिक, शैक्षिक, सैन्य व आर्थिक केन्द्र खः। थ्व छगू हलिं नगर खः व नापं हलिंया स्वंगू दकलय् अप्व मनूल्या दूगु नगर खः। थ्व नगरया हलिंया अर्थतन्त्र व अन्तरराष्ट्रीय समन्वयय् प्रभाव दु। बेइजिङ्ग उत्तरी चीनया ख्यलय् उत्तरी सिथय् ला। थ्व ख्यः यानशान पर्वः नापं ला। योङ्गदिङ्ग खुसि पुलां बेइजिङ्गया दक्षिण पश्चिमं बाहावनि।

बेइजिङ्ग चीनया प्राचीन राजधानी खः। थ्व नगरया निर्माण ३ द्व दँ स्वया न्ह्यः जूगु व राजधानीया कथं ८६०दँ स्वया अप्व समयया इतिहास दूगु छगू प्रसिद्ध ऐतिहासिक व सांस्कृतिक केन्द्र खः। थ्व नगरं लियाओ राजवंश, जिन राजवंश, युआन राजवंश, मिङ्ग राजवंश व चिङ्ग राजवंशं चीनय् शासन याःगु इतिहास दु। थ्व नगरं युआन, मिङ्ग व चिङ्ग राजवंश धुंका आधुनिक चिनिया संस्कृतियात स्वनातेगु ज्या याःगु दु। थ्व नगरय् यक्व ऐतिहासिक दर्शनीय स्थल व सांस्कृतिक क्षेत्र दु। नापं, थ्व नगर हलिंया दकले अप्व सांस्कृतिक सम्पदा परियोजना दूगु नगरय् छगू खः। थ्व नगरया यक्व ऐतिहासिक स्थलय् छुं नांजाःगु थासय् फरबिदन सिटी, तेम्पल अफ हेभन , समर प्यालेस, ओल्ड समर प्यालेस , बेइहाई पार्क आदि ला। बेइजिङ्गया पुलां नगरय् विशिष्ट छेँतेत महत्वपूर्ण सांस्कृतिक प्रतीकया रुपय् संरक्षित यानातःगु दु।

बेइजिङ्गया चीनया राजनीति, अर्थव्यवस्था, व्यापार, संस्कृति, शिक्षा, विज्ञान व प्रौद्योगिक क्षेत्रय् महत्वपूर्ण प्रभाव दु। थ्व नगरय् चिनिया राज्यया स्वामित्व दूगु उद्योगया अधिकांश मू ज्याकुथि दु। नापं, थ्व नगरय् फर्च्यून ग्लोबल ५००या दकले अप्व कर्पोरेत मुख्यालय दु। थ्व नगरय् दूगु पेकिंग विश्वविद्यालय व सिंघुआ विश्वविद्यालय चीनया शीर्ष विश्वविद्यालयया रुपय् कायेगु या।

स्वयादिस्ँ[सम्पादन]

• चीन

• बेइजिङ
• 
• 
• 
• 
• 
• 
• 
• 

विकिमिडिया मंका य् थ्व विषय नाप स्वापु दुगु मिडिया दु: Beijing